A Coral De Ruada será a encargada de poñer a nota musical no acto de ordenación e toma de posesión do novo Bispo de Ourense, Monseñor Leonardo Lemos Montanet, que se celebrará o sábaso, 11 de febreiro, a partir das 16,00 horas na S. I. Catedral Basílica do San Martiño de Ourense.

Ás 20,30 horas do xoves, día 27 de outubro de 2011, no teatro Principal, terá lugar a cerimonia de entrega do II PREMIO XABIER PRADO “LAMEIRO” ao Grupo de Danza – Castro Floxo da Deputación de Ourense “polo traballo que ó longo de máis de trinta anos levan realizando no campo da investigación, conservación e divulgación do noso folclore tradicional, non só a través da danza, senón tamén por medio de tódalas demais manifestacións etnográficas que a acompañan, como son a música, as súas vestimentas e os costumes que xiran arredor da mesma.”, segundo acordou por unanimidade o xurado.

Ademais da cerimonia de entrega do premio, durante o acto ofreceranse as actuacións seguintes:

• Representación dunha das pezas teatrais máis celebradas de Xabier Prado “Lameiro”: <<Na Corredoira>>. Xunto con <<Luis de Castromouro>>, foi unha das obras representadas pola Coral De Ruada na súa presentación ao público ourensán no desaparecido Salón Apolo, o día de San Xoán de 1919. Dende entón representouse en moitas ocasións e en múltiples escenarios de Galicia e de América con grande éxito. Nesta ocasión vai ser posta en escena polo grupo de teatro afeccionado Plataforma Independente de Teatro de Amoeiro (PITA), dirixido por César Francisco González Fernández.
• Actuación do grupo premiado, Grupo de Danza – Castro Floxo, que ofrecerá as danzas populares galegas: Muiñeira do Incio, Jota da Limia, Danza de Santa Tegra e Esparabán do Incio, interpretadas coa mestría que os distingue.
• A Coral De Ruada pechará o acto coas cantigas: Foliada de Moureira, Foliada de Amoeiro, Camiña Don Sancho, Trullada de Cambados e Ourense ao lonxe, co que se porá o punto final a esta velada de exaltación da nosa cultura popular.

A entrada ao teatro é libre até completar o aforo, recollendo, previamente, a invitación no propio teatro.

O luns, día 10 de outubro de 2011, reuniuse o xurado nomeado pola Coral De Ruada para estudar as candidaturas presentadas para a segunda edición do PREMIO XABIER PRADO LAMEIRO, co que se pretende, segundo contemplan as súas bases, “…premiar, de xeito simbólico, o labor desinteresado daquelas persoas ou colectivos que destaquen polo seu compromiso coa cultura de Galicia de expresión en idioma galego e de carácter popular, fundamentalmente no eido do folclore e, máis concretamente, na música popular e polifónica galegas.”

Para máis información entrar na sección PREMIO XABIER PRADO "LAMEIRO"

Un ano máis, a Coral De Ruada foi convidada a participar no programa especial que a TVG emitirá en directo dende o Pazo de Congresos de San Lázaro co gallo do Día de Galicia.

A Coral De Ruada terá dúas intervencións ao longo do programa: unha en solitario, interpretando a Pandeirada de Falván, e outra co grupo Treixadura e os Coros Galegos Históricos (Real Coro Toxos e Froles de Ferrol, Cántigas da Terra da Coruña e Cantigas e Agarimos de Santiago de Compostela) cos que interpretaremos a Foliada Marmuradora.