A Coral “De Ruada” organiza -co patrocinio da Concellería de Cultura, do Concello de Ourense e coa colaboración do teatro Principal- o VII CERTAME “DE RUADA” dentro da programación das Festas do Corpus de Ourense 2013.O programa deste VII Certame é o seguinte:

Sábado, día 15 de xuño, no Teatro Principal, ás 20,30 horas: Coral Isidoriana (León).

Domingo, día 16 de xuño, na Catedral de Ourense, ás 12,00 horas: Misa cantada pola Coral Isidoriana (León).

Sábado, día 22 de xuño, no Teatro Principal, ás 20,30 horas: Abertal (A Rúa - Ourense) e Cántigas da Terra (A Coruña).

Domingo, día 23 de xuño, na Igrexa do Mosteiro de Oseira, ás 13,00 horas: Misa cantada pola Coral De Ruada. Despois, na Carballeira de Oseira, a partir das 14,00 horas, Xantar e Romaría dos Amigos da Coral De Ruada.

Xoves, día 27 de xuño, no Teatro Principal, ás 20,30 horas: Concerto dos Amigos da Coral De Ruada.

Domingo, día 30 de xuño, na Praza Maior, ás 22,00 horas: Escola de Danza Castro Floxo da Deputación e Coral De Ruada.

A Coral De Ruada foi galardoada coa MEDALLA CASTELAO 2013. Tamén recibiron este galardón o gaiteiro Carlos Núñez e The Chieftains, a escritora en galego, de orixe alemá, Úrsula Heinze, a atleta paralímpica Hilda Rodríguez e a empresa Hijos de Rivera (Estrella Galicia).

Para tódolos que formamos parte da mesma constitúe un recoñecemento moi importante a unha traxectoria de case 95 anos. Dende o orgullo de pertencer a esta senlleira institución e coa ledicia que nos embarga neste momento queremos ter unha lembranza especial para os nosos fundadores: Virxilio Fernández González, Xabier Prado Rodríguez “Lameiro”, Fabriciano Iglesias Abella, Cesáreo Eire Santalla e Xulio Prieto Nespereira. 

Tamén merecen ser recordados con respecto e gratitude tódolos presidentes, dende José Sabucedo Morales até o actual,Eladio Quevedo Almoina, pasando por Olegario Muñiz García, Xabier Prado Rodríguez “Lameiro”, Antonio García Novoa “Perniñas”, Luís Pérez Colemán, Manuel Varela Fernández, José Ramón Muñiz Guerra, José Fernández Borrajo, José Ramón Calvo Cid, Francisco Domínguez Martínez, Francisco Ogando Vázquez e Manuel Rego Nieto.

Queremos tamén lembrar a tódolos directores, cos que De Ruada acadou o prestixio e o bo facer que agora se nos recoñece con este premio, dende Daniel González Rodríguez até o actual, Xoán Antón Vázquez Casas, pasando por Isolino Canal Freire, Antonio Jaunsarás Sanmiguel, os irmáns Manuel e Álvaro de Dios Martínez, Bruno Fuentes Blanco, Javier Luis Jurado Luque, José María Santos González Álvarez e Juan José Rumbao Requejo.

Por suposto, fondo agradecemento a tantos e tantas coralistas que dedicaron parte das súas vidas a que De Ruada vaia camiño de cumprir 95 anos de vida. A todos eles, sen ningunha excepción, moitas grazas.

Naturalmente, queremos agradecer o apoio que nos prestaron as institucións ourensás -Deputación, Teatro Principal, Concello, Caixa Ourense (¡qué gran perda para os ourensáns!)...- e galegas -Presidencia, Consellería de Cultura, Consellería de Educación...- porque foi decisivo para a supervivencia da Coral, sobre todo nalgúns intres especialmente difíciles.

Grazas tamén aos medios de comunicación -prensa escrita, radio, televisión, multimedia, etc.- por axudarnos a espallar as nosas inquedanzas, os nosos proxectos e as nosas actividades.

De Ruada paseou e segue a pasear o nome de Ourense -e mesmo de Galicia- por toda España, por Europa e por América, facendo ourensanismo (ou, como agora se di, ourensanía) por tódolos lugares onde actuou. Por iso, neste fermoso momento, se tivésemos que dedicar esta MEDALLA CASTELAO a alguén, aparte dos xa mencionados, sería a tódolos ourensáns e ourensás, os que viven en Ourense e os emigrantes, e, dun xeito moi especial, aos nosos Amigos (si, con maiúscula) que nos seguen dende hai moitos anos contra vento e marea e que nos apoian economicamente nestes difíciles tempos que estamos todos a pasar.

Por iso, parabéns a todos, xa que é un recoñecemento a Ourense, e moitas grazas por sernos fieis.

O sábado día 23 de febreiro, ás 18,00 horas, a Coral “De Ruada” celebrará a súa Asemblea Xeral Ordinaria anual, tal como prescriben os vixentes Estatutos. A reunión terá lugar no Centro Cultural “Marcos Valcárcel” da Deputación de Ourense (edificio Simeón).

Teñen dereito de asistencia á Asemblea tódolos coralistas e membros da actual Xunta de Goberno non coralistas. No transcurso da mesma, analizaranse diversos aspectos do funcionamento da Coral ao longo do ano 2012 (actividades realizadas, repertorio, ensaios, actuacións, actividades culturais, etc.), así como a previsión de actividades de cara ó ano 2013.

Ao remate da Asemblea Xeral Ordinaria, comezará unha Asemblea Xeral Extraordinaria que terá por obxecto a celebración de eleccións para a renovación da Xunta de Goberno, dado que a actual, presidida por Eladio Quevedo Almoina, foi elixida en febreiro do ano 2010 e, tal como prescriben os vixentes Estatutos, debe ser renovada no presente ano para outro período de tres anos.

Segundo os Estatutos mencionados, tódolos coralistas teñen dereito a voto e, á súa vez, todos poden ser elixidos para formar parte da Xunta de Goberno.

Como ven sendo tradicional, ó rematar a Asemblea os coralistas e as súas familias reuniranse nunha cea de confraternidade.  A cea terá lugar no Restaurante “Aixiña” a partir das 21,30 horas.

PREMIO XABIER PRADO “LAMEIRO”

BASES

1. A Coral De Ruada organiza e patrocina o Premio Xabier Prado “Lameiro”, de periodicidade anual, coa colaboración da Deputación Provincial de Ourense e do Teatro Principal.
2. Con este premio preténdese premiar, de xeito simbólico, o labor desinteresado daquelas persoas ou colectivos que destaquen polo seu compromiso coa cultura de Galicia de expresión en idioma galego e de carácter popular, fundamentalmente no eido do folclore e, máis concretamente, na música popular e polifónica galegas.
3. O Premio Xabier Prado “Lameiro”, de periodicidade anual, terá carácter de recoñecemento público e, polo tanto, materializarase nun elemento simbólico entregado á persoa ou colectivo premiado. Non leva engadido, por tanto, ningún beneficio económico. O premio consistirá nunha peza artística elaborada por un creador ou creadora de Galicia.
4. Calquera persoa -coralista ou non-, entidade ou colectivo poderá facer chegar á Xunta de Goberno da Coral De Ruada, mediante correo electrónico (info@coralderuada.com) ou correo ordinario (Coral De Ruada; Rúa da Paz, 9; 32005 Ourense), propostas de candidaturas para cada edición do premio, xuntando, con cada unha, memoria na que se detallen os méritos da persoa ou colectivo que se propoñen como candidatos ao Premio. A Xunta de Goberno da Coral De Ruada comprométese a facerlles chegar aos membros do xurado elixido cada ano toda a documentación recibida.
5. O prazo para a recepción de solicitudes abrangue dende o 15 de febreiro até o 15 de xuño de 2013, ámbolos dous inclusive.
6. O acto de entrega do premio, que se anunciará do modo máis axeitado, farase preferentemente arredor do 5 de outubro de cada ano -aniversario da reunión fundacional do Coro De Ruada que tivo lugar na “Villa Joaquina” da avenida de Zamora, na capital ourensá- e como homenaxe aos seus fundadores na figura de Xabier Prado “Lameiro”.
7. Serán os membros do xurado, seleccionado para cada convocatoria pola Xunta de Goberno da Coral De Ruada, os encargados de propoñeren e votaren as candidaturas e decidiren con total soberanía a persoa, entidade ou colectivo merecente do galardón.
8. O xurado estará constituído do xeito seguinte: o presidente e un secretario -con voz e sen voto, neste segundo caso- designados pola Xunta de Goberno da Coral De Ruada de entre os seus membros, e catro vogais designados pola Xunta de Goberno da Coral De Ruada.
9. A Xunta de Goberno da Coral De Ruada, que actuará como organizadora deste Premio, comprométese a respectar e cumprir as decisións do xurado.
10. As bases do premio publicaranse nun apartado específico da páxina web da Coral De Ruada (www.coralderuada.com).

 O concerto de Nadal na Catedral de Ourense e o de Reis na Igrexa de Santiago das Caldas constitúen dous dos principais concertos anuais da Coral De Ruada ao longo do ano, xa que conseguen congregar a un gran número dos seus seguidores que adoitan encher o primeiro templo ourensán e a igrexa do barrio da Ponte.

Xunto co Belén de Arturo Baltar, este concerto na Catedral é o principal referente das celebracións do Nadal ourensán. Debe terse en conta que a Coral ven ofrecendo este concerto dende o ano 1991, é dicir, vinteún anos ininterrompidos.

Como xa ocorrera en anos anteriores, o noso director artístico, Xoán Antón Vázquez Casas quere que, xunto a pezas clásicas da polifonía universal, De Ruada ofreza fermosos cantos de nadal compostos, adaptados ou harmonizados por músicos e letristas ourensáns moi vinculados, na súa maioría, á Coral De Ruada. Así poderemos escoitar as panxoliñas populares “Falade ben baixo” (estrea, con harmonización do noso director) ou “Cantémoslle ó Neno” (que estrea nova versión do noso director para varias voces). Tamén  cantos harmonizados, como “Tres Reis Magos”, do cóengo ourensán Camilo Andrade Rodicio (estrea); “Non era o tempo da frol” do ourensán Padre Manuel Feijóo Sousa e letra de Cipriano Torre Enciso; “Da miña aldea” baseado nun canto de Nadal popular recollido por Daniel González e arranxado polo noso director; “Nesta Navidade” de Raúl Rodríguez Pazo, discípulo de Antonio Jaunsarás Sanmiguel, con letra do poeta Víctor Campio; “A Belén Pastores” (Oratorio “Elías” ) de F. Mendelssohn, adaptada polo que foi director da Coral durante nove anos Juan José Rumbao Requejo, outro dos discípulos de A. Jaunsarás; “Noite de Nadal” do que foi durante moitos anos director do Orfeón Unión Orensana e gran amigo de De Ruada Gerardo Salgado Valdés, con letra de G. Calvo e Abelardo Santorum, gran poeta ourensán inxustamente esquecido; “Nosa Señora” unha panxoliña popular harmonizada por Juan José Rumbao Requejo; “Nun probe portal” de Manuel de Dios Martínez, tamén discípulo de A. Jaunsarás e un dos grandes directores da Coral De Ruada, á que dirixiu durante máis de trinta anos, con letra de Serafín Gómez Pato; “Nova luz” de Xoán Antón Vázquez Casas, o noso actual director, con letra do poeta e deán da Catedral de Ourense Serafín Marqués Gil. Naturalmente, non podían faltar as dúas panxoliñas máis emblemáticas do repertorio de De Ruada: “A Belén vinde pastores” e “Vinde ver ó Neno”, ámbalas dúas populares e harmonizadas polo músico navarro, ex director de De Ruada, organista da Catedral e profesor de Música do Seminario de Ourense, Antonio Jaunsarás Sanmiguel, mestre, como queda reflectido nas liñas anteriores, de moitos dos mellores músicos ourensáns.

Como novidade, este ano a nosa organista, Irma Fernández Alonso, interpretará no órgano da Catedral, recentemente restaurado, a fermosa obra In dir ist Freude (En ti está la alegría) (J.S. Bach, BWV 615), nun intermedio do concerto.

Os concertos contan co patrocinio da Concellería de Cultura, Festas e Festival de Cine do Concello de Ourense e coa colaboración da Consellería de Cultura da Xunta de Galicia, do Cabido da Catedral de Ourense e da Parroquia de Santiago das Caldas.